o係哩兩個月陪伴我老婆身邊o既其間，除左增加左我醫學常識 ( 因為經常出入醫院診所同見唔同o既醫生 ) 之外 , 我觀察到好多野 . 我想將我體會同感受到o既寫低，希望比將來身邊有親人（touch wood）不幸地須要長時間接受治療或要面對大型手術o既朋友一個参考，或者作個心理準備。
先講個人裝備 , 由於您要長時間照顧帶住負能量o既病人，首先將自己裝滿正能量，一直保持笑容，好精神咁o既樣（最低限度同佢相處o既時候你要咁樣 )，盡量少提及病情 , 多講 "毛獠野" 分散佢注意。就算有必須要談及病情，傾完就要立即將佢抽離返，千萬唔可以比佢沉淪係恐懼中。就算周車勞頓，幾頻撲都好，您唔可以病同表現得好攰，因為咁樣會比佢覺得自己係您包袱。
"意志催谷體能" 哩招好 work，有幾次作病，我都會同自己講 "唔準病，未病得，唔準病，未病得" 用意志催眠自己 . 如事者 , 第二日訓醒就冇事。您要時刻保持冷靜，為病人作最適當o既決定。哩個時候您會聽到好多純個人經驗同好主觀o既個人意見。雖然佢地未必係最專業 , 而且仲會包含 "各門各派o既學說" , 但係目的都係想病人早日康復。首先您必須感激 , 專重及細心聆聽所有人o既意見 , 之後再消化 , 分析。不要被好多及各花各樣o既意見打亂方針。哩一點係最難做到o既 , 所以簡單 D , 盡量只聽最專業 , 最有學識o既人講。
除左醫護人員 , 您同病人會面對好多 "朋友" , 我想分享下您有機會遇到以下幾類 "朋友" .
有好多朋友會同病人好錯誤地講 d 好正確o既野 , 例如 "唔好帶負能量 , 要帶正能量呀" . 我覺得其實病本身就係負能量 , 如果帶正能量就唔會病啦。病人係帶負能量係事實 , 病人係唔會自己突然生產正能量 ! 正能量係要由病人身邊o既人傳送之後引發 , 再繼而慢慢生產 . 絕對唔會因為一句 "唔好負面 , 要正面" 就會一秒間變成勁正能量 ......
有好多朋友會好主觀咁以健全身體者o既心理質素去批評病人o既心理狀態 , 例如 "點解會咁諗架 !" 。我明白將心比己唔係人人做到 , 所以我唔會反駁佢地 , 因為佢地又係錯誤地講 d 好正確o既野 . "點解會咁諗架 !" , 如果您受住相同o既痛苦您就會好清楚點解佢會咁諗架喇 .
會有好多 "朋友" 託您做一件事 , 對於哩件事 , 我仍未諗到辦法去做 , 所以好對唔住 , 分享唔到比您 . 哩件事就係 "幫我好好照顧佢" . 我真係唔識關心點樣去幫 . 我曾經諗過不如咁講 : "嗱 , 而家關心緊您o既其實唔係我 , 我係幫緊呀邊個邊個關心緊您" . 咁究竟我邊一下幫緊邊一個 ? 攪到自己都亂晒 . 但原來我唔係代表 "我" , 我係幫緊其他人 , 咁係咪等於 "我" 唔關心佢呢 ? 係咪一句說話拜託左別人做都係關心左呢 ? 我係咪笨人出手幫緊 d 精人呢 ? 太深奧喇 ...... 所以我會簡單 d , 繼續做好 "我" 自己 , 唔 "幫" 喇 , 因為真係唔識 . 對於哩班 "朋友" , 回應一句 "多謝晒" .
我非常清楚別人o既諒解同關心唔係必然o既 , 因為家家有本難唸的經 , 而且各有各忙 .
有 d "朋友" 一開始表現得好關心 , 但係路遙知馬力 , 之後會慢慢唔見左人 ; 有 d 會好似記得先關心下您 ; 有 d 關係好似好親 , 但係冇咩見過佢關心 . 當然亦有 d 患難見真情 , 之前一直冇咩聯絡 , 知您有事立即出現返 ; 有 d 就算自己本身有病都會為您擔心 ; 有 d 更出錢出力出時間為您 .
無論係以上邊種 "朋友" 都好 , 都係最少有一刻想個病人好 , 您都應該感謝佢地 , 唔可以奢望佢地再多 d . 因為最緊要o既係 "您" ! "您" 係 "您" 所控制到o既 , 而 "朋友" 並唔係 "您" 所控制到o既 , 做好自己 , 珍惜自己同病人相處o既每一分每一秒 ......
仲有雖然冇咩 "朋友" 會注意到您o既痛苦同壓力 , 但係記住 ! "佢" 好就得架喇 :)
沒有留言:
張貼留言