親親我的寶貝

從冇諗過會o係哩個情況下開始我 Blog o既第一篇文章 .

哩篇係一封給我兒子的信 ........

親愛o既乖仔 ,

其實o係您未有生命開始 , 老豆我已經幫妳改定名 , 叫做 余 亮 , 雖然改o既一刻已經預左您第時一定會比 d 同學仔改花名做 "魚糧" , 您可能會嬲老豆整古您幫改哩個名 , 但係我相信有一日您會好多謝我幫您改左個咁有意思既名 .

第一個意思係 :

"余" 係文言文 "我" o既意思 , 余 亮 即係我會發光發亮 .

第二個意思係 :

"余" 與 "瑜" 同音 , 余 亮 音 "瑜 , 亮" , 即係 周 瑜 和 諸葛 亮 .

老豆希望您習 周 瑜 同 諸葛 亮 o既所有優點於一身 , 智慧 , 文武雙全 , 溫文爾雅 , 精通音律 , 外型俊朗 ( 相傳周 瑜 美俊非凡 , 有美周郎之稱 ) .

知道您媽媽有左您的一刻已經開始好開心 , 經常聽住周華健既"親親我的寶貝" , 好似點歌比您聽咁 .

12 月 19 日首次見面

12 月 18 日知道妳媽媽心臟有問題 , 所以12 月 19 日我 , 妳媽媽 , 仲有您師婆就決定去資詢多一位醫生意見 . 我第一次o係透過超聲波見到您 , 當時您只得幾厘米高 , 見到您隻腳仔撐下撐下 , 我真係好感動 , 醫生話您好活潑 , 我覺得您知道老豆望緊您 . 經過幾位醫生既專業意見 , 都係如果媽媽繼續懷孕 , 到懷孕後期媽媽同 BB 都會有生命危險 , 所以一定要盡快終止懷孕並盡快進行心臟手術 . 12 月 19 日係我地第一次見面亦係最後一次見面 .

12 月 29 日相處的最後一天

12 月 29 日陪您媽媽再次入院 , 準備第二朝 7 點鐘o既流產手術 , 雖然哩個決定從客觀條件上睇係對媽媽生命危險性係相較最低 , 但係我地絕對唔想犠牲您 , 我同您妳媽媽都好冀望您o既來臨 , 我仲諗定第時會點教您 .

仔呀 , 由於您o既出現 , 我地先知道媽媽原來心臟有問題 , 身上原來有個隨時爆炸既炸彈 . 您係咪一早打算犠牲自己都要我地醫好媽媽 ? 我相信您會同我地講 "係" ! 您放心啦 ! 我會好好睇住媽媽 , 我會陪佢安全而成功咁完成心臟心術 , 而我相信妳媽媽一定會好堅強去面對同克服哩次難關 ! 唔會令您失望同唔會要您白白犠牲 !

聽朝您就要走喇 , 之後您會返上天堂做小天使 . 您會繼續活o係我同妳媽媽o既心中 , 您會不停為妳媽媽加油 .

沒有您 , 麥當勞都變得無味

由細到大 , 老豆一唔開心就會去食麥當勞 , 食完之後就會開心返 . 今日離開左醫院之後 , 我去麥當勞食晚餐 , 不過今日冇開心返 . 仔呀 , 您一定要保佑媽媽呀 .

如果聽日醫生整痛您 , 您唔好嬲醫生呀 , 更加唔好嬲媽媽 , 老豆同您講對唔住丫 .

非常愛您的老豆上

12/30/2009